Sipat 4 perkara

Dawuh Prabu Abiyasa ka anak panengahna Raden Pandu Dewanata disaksian ku Semar Badranaya ngenaan sipat nu 4 perkara :

1.   Jujur dina nyarita, enya ceuk enya na, lain kudu ceuk laina, ulah nu lain di enya enya, nu enya di lain-lain, sabab nu kitu, yakin bakal ngaruksak katentreman, tapi lamun sagolek pangkek sa cangreg pageuh, enya dienyakeun lain di lainkeun, eta luyu jeung bakal lempeng kaituna, ngadek sacekna, nila saplasna, dibarengan ku leleus jeujeur liat tali moal rek ngabulat beulit kanyataan, moal dek ngaharamkeun nu halal, ngahalalkeun nu haram.

2. Kudu bener-bener ngalaksanakeun amanah, heulaanan amanah nu aya di diri sorangan, ulah waka nuduh nu jauh, nyawang nu angang, sabab sakabeh anggota badan jadi saksi di yaumil akhir.

3. Cing apik barang dahar, naha eta nu rek didahar ku anjeun teh tinu ladang basilat, korupsi, atawa neangan  untung bari jeung ngarugikeun batur, kade nu kitu ulah didahar bisi jadi bagal pangawasa, akhirna turunan jadi ruksak  kaituna.

 4.  Ulah ngaluarkeun ci panon sanajan sakumaha meunang peristiwa, ku sabab dina perjuangan yakin bakal mangih  rupa-rupa kapeurih, kanyeri, jeung sajabana, moal teu kitu sabab dina jero perjuangan mah kudu ngaliwatan pengorbanan, eta proses hirup..iwal ti urang teh kudu sabar, daek saling wasiatan ku hakna, iman jeung amal soleh, ari sabar teh lain ditampiling cicing, ditajong morongkod, digebug murungkut, sabar teh hartina bisa mertahankeun kanu sagala persoalan numatak ngarugikeun kana diri.

Ieu elmu teh prak barengan ku iman jeung ku takwa, sabab, lamun elmu wungkul cilaka,  boga elmu yakin bakal pinter, tina pinter bakal enteng usahana, tina enteng usahana, bakal loba hasilna, ngan gede dosana sabab nu pinter mah usahana kanu bodo, jadi cinekna tukang tipu, jadi lamun pinter wungkul mah jadi tukang tipu.

Lamun iman wungkul ge bahaya, sabab bakal babari katipu.

Jadi  elmu iman jeung takwana teh jang ngendalikeun hawa nafsu, nafsu anu salilana ngan mikiran dunya wungkul tanpa mikiran akherat.

Lamun geus bisa kitu, maca amanah tea ti pangeran, bakal bisa jadi ais pangampih anu guna, jadi pamingpin anu aya manpaatna tur ta bersih oge berwibawa.